2Ch 10 | NdeIBE | STEP | URehobhowami waya eShekemu ngoba bonke abako-Israyeli babeye khona ukuze bamethwese ubukhosi.

2 Chronicles 10

Abako-Israyeli Bavukela uRehobhowami

1 URehobhowami waya eShekemu ngoba bonke abako-Israyeli babeye khona ukuze bamethwese ubukhosi. 2 Kwathi uJerobhowami indodana kaNebathi ekuzwa lokhu, (wayeseGibhithe lapho wabuya evela eGibhithe ayekhona, ebalekele inkosi uSolomoni.)

3 Abako-Israyeli basebethumela ilizwi bembiza uJerobhowami, kwathi-ke yena kanye labo bonke abako-Israyeli baya kuRehobhowami bafika bathi: 4 “Uyihlo wasithwalisa umthwalo onzima, kodwa wena khathesi ake uphungule ubunzima asethesa bona, wethule lemithwalo yethu enzima abesithwalise yona, yikho sizakukhonza.”

5 URehobhowami wabaphendula wathi: “Libobuya ngemva kwezinsuku ezintathu.” Ngakho abantu basuka bahamba.

6 INkosi uRehobhowami yasicebisana labadala ababeloyise uSolomoni esaphila, yathi: “Lingicebisa ukuthi ngibanike mpendulo bani lababantu?”

7 Abadala bathi, “Ungaba lomusa kulababantu, ubathokozise, ukhulumisane labo kuhle, bazakuba yizinceku zakho.”

8 Kodwa uRehobhowami wasidelela iseluleko sabadala, wasecebisana lamajaha ayeyintanga yakhe, ababeyizikhonzi zakhe.

9 Wawabuza wathi, “Lingipha seluleko bani? Singabapha mpendulo bani lababantu abathi kimi, ‘Ake uphungule ubunzima esabetheswa nguyihlo’?”

10 Amajaha ayeyintanga yakhe amphendula athi, “Batshele lababantu abathi kuwe, ‘Uyihlo wasethwesa ubunzima, akusiphungulele lobubunzima’ uthi kubo, ‘Ucikilicane wami uqatha kulokhalo lukababa. 11 Ubaba walethwesa ubunzima, mina ngizakwengezelela kubo. Ubaba walitshaya ngezaswebhu, mina ngizalilumisa ngezinkume.’ ”

12 UJerobhowami labo bonke abantu babuyela kuRehobhowami ngosuku lwesithathu njengokutsho kwakhe ukuthi, “Phendukani lize kimi ngemva kwensuku ezintathu.” 13 Lakanye inkosi yaphendula abantu ngolaka, yalahla iseluleko sabadala,

14 yalandela iseluleko samajaha yathi, “Ubaba walethwesa ubunzima, mina ngizakwengezelela kubo. Walitshaya ngezaswebhu, mina ngizalilumisa ngezinkume.” 15 Ngakho inkosi kayibalalelanga abantu, ngoba lokhu kwenziwa nguJehova uNkulunkulu ukuba kugcwaliseke ilizwi lakhe ayelikhulume ngo-Ahija umShiloni kuJerobhowami indodana kaNebathi.

16 Kwathi bonke abako-Israyeli bebona ukuthi inkosi iyala ukubalalela bayiphendula bathi: “Silesabelo bani kuDavida na, silengxenye bani endodaneni kaJese na? Yanini emizini yenu lina bako-Israyeli! Sala lendlu yakho, Davida!” Ngakho bonke abako-Israyeli babuyela emakhaya. 17 Kodwa uRehobhowami waqhubeka ebusa abako-Israyeli. ababehlala emizini yakoJuda.

18 INkosi uRehobhowami yasithuma u-Adoniramu owayengumphathi wezibhalwa, kodwa abako-Israyeli bamkhanda ngamatshe wafa. Kodwa inkosi uRehobhowami yaphanga yakhwela enqoleni yayo yokulwa, yabalekela eJerusalema. 19 Kusukela kulesosikhathi abako-Israyeli bayihlamukela indlu kaDavida kuze kube lamuhla.